In Chololiztli icuic
One nen notlacatl,
o nen nonquizaco
teotl ichan in tlaltipac,
¡ninotolinia!
In ma on nel nonquiz,
in ma on nel notlacat.
Ah niquitohua yece…
¿tlein naiz?,
¡anonohuaco tepilhuan!
¿at teixo ninemi?,
¿quen huel?,
¡xon mimati!
¿Ye ya nonehuaz in tlalticpac?
¿Ye ya tle in nolhuil?,
zan nitoliniya,
tonehua noyollo,
tinocniuh in ayaxcan
in tlalticpac, ye nican.
¿Quen in nemohua in tenahuac?
¿Mach ilihuiztia,
nemia tehuic, teyaconi?
¡Nemi zan ihuiyan,
zan icemelia!
In zan nonopechteca,
zan nitlotinemi
in tenahuac.
Zan ye ica nichoca,
¡nicnotlamati!
no nicnocahualoc
in tenahuac tlalticpac.
¿Quen quinequi noyollo,
Ipalnemohuani?
¡Ma oc melel on quiza!
A icnopillotl ma oc timalihui,
Monahuac, titeotl.
¿At ya nech miquitlani?
¿Azomo ye nelli tipaqui,
ti ya nemi tlalticpac?
Ah ca za tinemi
ihuan ti hual paqui in tlalticpac.
Ah ca mocha ihui titotolinia.
Ah ca no chichic teopouhqui
tenahuac ye nican.
Ma xi icnotlamati noyollo.
Maca oc tle xic yococa.
Ye nelli in ayaxan
nicnopiltihua in tlalticpac.
Ye nelli cococ ye otimalihuico,
in motloc monahuc, in Ipalnemohua.
Zan niquintemohua,
niquilnamiqui in tocnihuan.
¿Cuix oc ceppa huitze,
in cuix oc nemiquehui?
Zan ce ti ya polihuia,
zan ce ye nican in tlalticpac.
¡Maca cocoya inyollo!,
itloc inahuac in Ipalnemohua.
Nezahualcoyotl.
LEÓN-PORTILA, Miguel. La tinta negra y roja, ed. Era, México, D.F., 2008, págs.126-130.
